Presidenti polak vendos të bojkotojë memorialin e Holokaustit në Izrael

Polonia konfirmon për Euronews se presidenti i vendit, Andrzej Duda, do të bojkotojë ceremoninë që shënon çlirimin e kampit të përqendrimit nazist Aushvic, pasi i është refuzuar kërkesa për të mbajtur një fjalim.

Përmes një deklarate, presidenti polak tha se nuk sheh asnjë arsye përse nuk është lejuar të flasë, pasi iu është kërkuar udhëheqësve të Francës, SHBA-së, Mbretërisë së Bashkuar dhe Rusisë.

Presidenti Duda tha se mungesa e një zëri polak gjatë konferencës – e cila shënon këtë vit 75 vjetorin e çlirimit të Aushvicit– është “një falsifikim i historisë”.

Ai ka kërkuar t’i përgjigjet presidentit rus, Vladimir Putin, i cili së fundmi i ka hedhur Polonisë një pjesë të fajit për Luftën e Dytë Botërore.

Kjo nuk është hera e parë që Putin bën akuza të tilla, duke pretenduar në një sërë rastesh se Polonia është përgjegjëse për luftën që ka filluar në 1939, kohë kur vendi u pushtua nga Gjermania Naziste dhe më pas Bashkimi Sovjetik.

Më pas, Polonia u kthye në vendngjarjen e disa prej mizorive më të mëdha të regjimit nazist. Rreth 6 milion hebrenj janë vrarë gjatë Holokaustit, 3 milion prej tyre me origjinë polake.

Memoriali Holokaustit

Nëpërmjet një deklarate, Jad Vashemi, Memoriali i Holokaustit në Jeruzalem, konfirmoi se presidentit Duda nuk do t’i kërkohet të flasë në ceremoninë e Forumit Botëror të Holokaustit më 22 dhe 23 janar.

“Liderët që do të flasin në këtë ceremoni përfaqësojnë 4 fuqitë e mëdha aleate, të cilët çliruan Europën dhe botën nga tirania vdekjeprurëse e Gjermanisë naziste”, tha një zëdhënës për Euronews.

“Është e rëndësishme të theksohet se nga 1.5 milion viktima nga kampi i vdekjes Aushvic-Birkenau, rreth 1.1 milion ishin hebrenj të cilët u vranë thjesht sepse ishin hebrenj”.

Putin e ka kundërshtuar ashpër rezolutën e adoptuar nga Parlamenti Europian që thotë se Bashkimi Sovjetik mban përgjegjësi për Luftën e Dytë Botërore së bashku me Gjermaninë, duke e cilësuar si “absurditet absolut”.