Nderohet Dhimitër Anagnosti, regjisori i njohur merr dekoratën e lartë “Gjergj Kastrioti Skënderbeu”

Presidenti Ilir Meta ka vlerësuar me dekoratën e Lartë “Gjergj Kastrioti Skënderbeu”, regjisorin dhe kineastin Dhimitër Anagnostin në 85-vjetorin e lindjes së regjisorit.

Kreu i Shtetit e vlerësoi kineastin me motivacionin për personalitetin gjenial dhe dominimin në mënyrë të pamohueshme me veprat e tij në kinematografinë shqiptare, duke e lartësuar dhe përfaqësuar atë me dinjitet brenda dhe jashtë vendit”.

Për Presidentin Meta, vepra e regjisorit Anagnosti është sot një frymëzim për të gjithë. Ndërsa vetë kineasti e konsideroi një ditë të veçantë dekorimin nga Presidenti.

“Sot është një ditë e veçantë për mua. Falenderoj të gjithë njerëzit me të cilët kam punuar vite të tëra dhe bashkë kemi lëvizur në vendin tonë dhe bëmë ato vepra të filmit.

Vepra e kineastëve jeton në çdo brez. Falenderoj Presidentin e Republikës, z.Meta që më nderon me një titull të lartë”, u shpreh regjisori Anagnosti.