Vazhdon të zhgënjejë Skënderbeu, Vllaznia barazon me Kastriotin dhe Kukësi arrin fitoren e dytë radhazi

Skënderbeu vazhdon serinë e zhgënjimeve  dhe këtë radhë në shtëpi përballë një rivali direkt si Apolonia, duke mos shkuar më shumë se barazimi 1-1. Të dy golat u shënuan me 11-metërsha, teksa Meksi zhbllokoi sfidën në minutën e 52-të, ndërkohë që Gjata vendosi baraspeshën po nga pika e bardhë e penalltisë.

Skënderbeu kishte plot 10 vite që nuk zhgënjente në shtëpi ndaj Apolonisë duke treguar sërish periudhën e keqe që po kalon skuadra juglindore

Është mbyllur në barazim pa gola sfida mes Vllaznisë dhe Kastriotit. Një hap fals ky pas ecurisë pozitive me 3 fitore radhazi. Ky ishte barazimi i tretë në kampionat për Vllazninë, ndërkohë që në krahun tjetër, krutanët e Ndreut u rikthyen te rezultatet pozitive pas 2 humbjesh radhazi.

Kukësi ka regjistruar fitoren e dytë radhazi, teksa ka mposhtur me rezultatin 2-1 Bylisin në “Elbasan Arena”, në ndeshjen e vlefshme për  javën e 16-të në Kategorinë Superiore. Me këtë fitore Kukësi shkon në kuotën e 23 pikëve në vendin e 4-t, ndërsa Bylisi mbetet në kuotën e 12 pikëve në vendin e parafundit.