Certifikimi i kandidatëve, rrugët ligjore që mund të ndjekin partitë si LVV, AAK dhe NISMA

Lëvizja Vetëvendosje, AAK e Nisma Socialdemokrate, dorëzuan ankesat në Panelin Zgjedhor për Ankesa e Parashtresa.

Ata këtë e bënë brenda 24 orësh. Por cila është rruga ligjore që ato duhet të ndjekin.

 “Ata kanë të drejtë të fillojnë procesin e ankimimit dhe procesi i ankimimit shkon nga PZAP dhe nëse të njëjtit nuk janë të kënaqur edhe me vendimin që do ta marrë PZAP-ja, atëherë e kanë edhe një shkallë që është Gjykata Supreme”, tha Yll Zekaj nga Instituti i Kosovës për Drejtësi.

PZAP-ja ka afat 72 orë që të marrë vendim, i cili nëse është negativ për subjektet politike, ato kanë edhe një mundësi.

“Normalisht që Gjykata Supreme në afate të shkurtuara kohore vendos mbi atë që është kërkuar prej saj”, u shpreh  Florent Spahija, nga Instituti Demokratik i Kosovës.

Gjykata Supreme ka kohë tri ditë që të vendosë në lidhje me rastet. Heqjen e kandidatëve nga listat si kandidatë që kanë rënë ndesh me ligjin, juristët e vlerësojnë si zbatim të vendimit të Kushtetueses.

“Njoftimin e KQZ-së ndaj partive politike me këtë numër prej 47 kandidatëve për deputetë të cilët bihen ndesh me vendimin e Gjykatës Kushtetuese e shohim vetëm si zbatim të aktgjykimit të Gjykatës Kushtetuese. Dhe krejt kjo që tani rrjedhë nga ky vendim është përkatësisht derivat i këtij procesi”, tha zoti Zekaj.

Listat me kandidatë për deputetë të Vetëvendosjes, AAK-së e Nismës nuk u certifikuan nga Komisioni Qendror i Zgjedhjeve sepse ato refuzuan t’i largojnë ata emra, që sipas Këshillit Gjyqësor të Kosovës, janë të dënuar në tri vitet e fundit.

Lexoni gjithashtu:

Lista e kandidatëve të AAK në zgjedhje, Teuta Haxhiu paralajmëron ankimim në instancat më të larta

Si do të ndikojnë ngjarjet në Kosovë në zgjedhjet e 14 shkurtit? Flet kandidati i LDK