Gërvalla reagon pas deklaratave të Vuçiç: Pavarësia e Kosovës nuk shkel Kartën e OKB

Ministrja e Punëve të Jashtme dhe Diasporës e Kosovës, Donika Gërvalla, ka dënuar fjalimin e presidentit të Serbisë, Aleksandër Vuçiç, të mbajtur para Asamblesë së Përgjithshme të OKB-së, dhe tha se ishte një “tentim për shtrembërim të historisë” lidhur me Kosovën.

Gërvalla hodhi poshtë pretendimet e Vuçiçit se “zanafillën e agresionit rus në Ukrainë e sheh te pavarësimi i Kosovës, dhe paturpshëm pretendon se më 2008 Serbisë i ka ndodhur kjo që i ndodhë Ukrainës sot”.

“Deklarata e shpalljes së pavarësia e Kosovës nuk është shkelje e ligjit ndërkombëtar, e as rezolutave dhe dokumenteve të tjera relevante të OKB-së, rrjedhimisht as Kartës së OKB-së. Këtë e ka gjykuar dhe vendosur trupi më i lartë juridik i OKB-së, Gjykata Ndërkombëtare e Drejtësisë, në opinionin e saj të nxjerrë më 22 korrik 2010,me kërkesë të vet Serbisë”, tha Gërvalla përmes një deklarate të lëshuar në orët e vona të 21 shtatorit.

Vuçiç para Kombeve të Bashkuara akuzoi shtetet Perëndimore se kanë “shkelur brutalisht” Kartën e OKB-së dhe Rezolutën 12 44, duke e njohur pavarësinë e Kosovës dhe duke “i mohuar të gjitha parimet që sot po i mbrojnë”.

Rezoluta 12 44 e Kombeve të Bashkuara, së cilës iu referua Vuçiçi, i dha fund luftës në Kosovë. Ndër të tjera, rezoluta parasheh mandatin e misionit paqeruajtës të NATO-s, KFOR, me qëllim të mbrojtjes së të gjithë qytetarëve të Kosovës.

“Me këto shpifje dhe përpjekje për shtrembërim të historisë, presidenti i Serbisë ka keqpërdorur rëndë foltoren e Asamblesë së Përgjithshme të OKB-së. Nëse ka një ngjashmëri mes agresionit rus në Ukrainë dhe rastit të Kosovës, ajo është vetëm te fakti se Rusia sot ka marrë në shënjestër Ukrainën dhe ukrainasit ashtu si Serbia më 1999 kishte marrë në shënjestër Kosovën dhe shqiptarët e Kosovës”, tha Gërvalla, duke shtuar se për këtë arsye Kosova përkrah Ukrainën në luftën kundër Rusisë.

LEXONI GJITHASHTU:

• Paguaj dhe mos bëj burg, ja dënimet që mund të konvertohen
• Tirana kërkon reciprocitet/ Për shqiptarët në Serbi, të drejta si serbët në Kosovë