“Lupin” korr sukses në Netflix, arrin 70 milionë shikues

“Lupin”, seriali i prodhuar nga Netflix, një version modern i historisë së hajdutit më të dashur francez, me aktor kryesor Omar Sy, ka arritur 70 milionë shikues në mbarë botën në muajin e parë të transmetimit, duke vendosur rekord për shfaqjet franceze.

Seriali dhe personazhi frymëzohen nga një hero i letërsisë së fillim-shekullit të njëzetë, i sjellë në jetë nga Maurice Leblanc. Mbesa e tij ka parë versionin e përshtatur.

“Është gazmor dhe i punuar bukur. Episodi i parë mu duk disi i dhunshëm. I dyti është më i qetë dhe më në frymën e asaj që bënte Maurice Leblanc. Por natyrisht, meqë është modernizuar, nuk është më në kontekstin e vetë. Është vështirë të krahasohet. Omar Sy nuk është Arsène Lupin. Ai është një produkt i Arsène Lupen dhe vjedh sipas mënyrës së tij”, tha Florence Leblanc.

“70 milionë, kjo është çmenduri”, shkruante Omar Sy në Twitter. “Krenar që ‘Lupin’ është seriali i parë francez që ka arritur një sukses të tillë ndërkombëtar.”

Libri i vitit 1905, mbi të cilin bazohet seriali, është ngjitur në majat e librave më të shitur në faqen e Amazon në Francë, që prej publikimit të serialit televiziv.

“Ishte e qartë që seriali kishte nxitur shitjen e librit. Libri që ne shohim rregullisht në duart e Omar Sy dhe djalit të tij në serial tashmë është jashtë stokut. Presim për rishtypjen e tij dhe ndërkohë, ne, për të ndjekur këtë lëvizje dhe për të përfituar nga tërheqja e të rinjve ndaj këtij libri, kemi rekomanduar një seri të tërë librash”, thotë amanda Spiegel.

Triumfi i “Lupin” në Netflix, pas serialit “La Casa de Papel”, ilustron fundin e sundimit amerikan mbi prodhimet televizive, një lëvizje e zhvilluar më tej nga platformat dhe ambicia e re e aktorëve europianë, latino-amerikanë ose koreanë.