Manchester United ndalet nga vendi i fundit në kampionat, debutim pa gola i Tuchel te Chelsea

Manchester United u ndal befasisht 2-1 nga vendi i fundit në renditje Sheffield United duke humbur mundësinë për të rimarrë vendin e parë të kryesimin.

Në Old Trafford skuadra e Ole Gunnar Soslkjaer kërkonte tre pikët për t’i rimarrë kreun Manchester City-it, mirëpo ajo u shtang në më pak se 30 minuta nga një gol i Kean Bryan.

Anthony Martial pa një gol t’i anulohej, ndërsa Harry Maguire barazoi përkohësisht.

Miqtë u përgjigjën 16 minuta më vonë me Oliver Burke, i cili realizoi golin e fitores së parë të Sheffield ndaj United-it që prej vitit 1992.

Sheffield në 19 ndeshje kishte marrë vetëm pesë pikë duke regjistruar formën më të keqe të gjithë historisë së kampionatit kryesor anglez që prej ri-formatimit të saj. Por kritikët sportivë shohin një problem më të madh te United se sa vetëm humbja me vendin e fundit.

“Djajtë e Kuq” kanë humbur deri më tani këtë sezon katër ndeshje në shtëpi, çka është rezultati më negativ që prej vitit 2014 ku skuadra drejtohej nga David Moyes.

Paralelisht në ndeshjet e tjera të së mërkurës, ndeshja e parë e Thomas Tuchel në drejtimin e Chelsea-it u mbyll pa gola përballë Wolves-it, ndërsa Leicester u ndal 1-1 me Evertonin.

Kështu Manchester City ka mundësi të zgjerojë më tej kryesimin e kampionatit ndërsa në fundjavë ndeshet pikërisht me Sheffield United-in.