Gjendet piktura e vjedhur nga nazistët, gjykata franceze ia rikthen familjes së blerësit të saj fillestar

Emri i kësaj pikture të Andre Derain është ‘pylli me pisha’. Një pikturë që iu rikthye familjes së zotëruesit të saj të parë, një koleksionist arti me origjinë hebraike, i cili vdiq në një kamp përqendrimi nazist në janar të vitit 1945.

Qyteti i Marsejës në Francë, i cili ekspozoi këtë pikturë në muzeun Cantini, u urdhërua nga gjykata që t’ia kthente këtë pikturë familjes së blerësit të saj fillestar.

“Dua që t’i kushtoj një homazh, një homazh të veçantë, njeriut që kishte perceptuar vlerën e jashtëzakonshme të kësaj pikture, dhe të cilit po ja kthejmë sot, në mungesë, këtë pronë. Ky njeri, Rene Gimpel, e bleu pikturën në vitin 1921, nga një tregtar tjetër arti, por mbi të gjitha ai ishte një hero i Rezistencës”, u shpreh Benoit Payan, kryetari i Bashkisë së Marsejës.

Pasi u largua nga Parisi, Rene Gimpel gjeti strehim në Marsejë. Rreth 80 vepra që ai posedonte u konfiskuan nga nazistët, dhe në mënyrë që të mbijetonte dhe të financonte rrjetin e rezistencës, ai u detyrua që ta shiste pikturën me pisha. Këtë shitje të detyruar gjykatat franceze e kanë konsideruar si zhvatje.

Kryebashkiaku u Marsejës i bëri thirrje të gjithë bashkiakëve të tjerë francezë që të bënin detyrën e tyre, duke u angazhuar me restaurimin e veprave të artit.

Rreth 100 000 vepra arti u vodhën në Francë Gjatë Luftës së Dytë Botërore, 60 000 prej të cilave u gjetën në Gjermani dhe u rikthyen në Francë.