Burg shoferes së aksidentit në Vlorë, gënjeu në polici se mjeti drejtohej nga shoqja e saj

Gjykata e Vlorës i ka komunikuar masën e sigurisë “arrest me burg” 22-vjeçares Silvi Muho e cila dy ditë më parë u aksidentua së bashku me shoqen e saj, Anxhela Çapo e cila mbeti e vdekur në vend.

Togat e zeza ja kanë komunikuar masën e sigurisë 22-vjeçares në ambientet e spitalit të Vlorës, ku kjo e fundit prej ditësh ndodhet nën kujdes shëndetësor. Fillimisht u raportua se në drejtimin e automjetit në momentin e regjistrimit të aksidentit ishte viktima, 23-vjeçarja Çapo, por më pas hetimet zbuluan se Muha kishte gënjyer dhe ishte ajo shofere e mjetit tip ‘Hunday’.

22-vjeçarja Silvi Muha u arrestua nga policia një ditë pas aksidentit të regjistruar mbrëmjen e së martës në aksin Vlorë-Fier, ku sipas policisë shkak u bë dalja e makinës nga rruga si pasojë e shpejtësisë së lartë me të cilën udhëtonte automjeti.