‘Sputnik V’, ekspertët thonë se vaksina ruse ka 91.6% efikasitet ndaj COVID-19

Sipas një studimi të publikuar në të përjavshmen mjekësore “The Lancet”, vaksina e prodhuar në Rusi ka një efikasitet prej 91.6% kundër COVID-19.

Kjo analizë e jashtme nga faza e tretë e testimeve të Vaksinës Gam-Covid-Vac tregoi efikasitet prej 91.6% ndaj COVID-19, ashtu si edhe tolerancë në shkallë të gjerë në një grup të konsiderueshëm njerëzish.

Zhvillimi i vaksinës ruse Sputnik V është cilësuar shpeshherë si i nxituar, pa bazë kërkimore dhe për mungesë transparence. Por, përfundimet që shohim këtu janë të qarta dhe parimet e vaksinimit janë të provuara, çka nënkupton se tashmë kemi edhe një tjetër vaksinë që mund ti bashkohet betejës kundër COVID-19.

“Publikimi i raportit të ‘Lancet’ tregon se vaksina Sputnik V është vaksinë për njerëzimin. Është një ndër tri vaksinat e vetme që kanë efikasitet më të lartë se 90%, ndërkohë që financiarisht është shumë e përballueshme. Nga ana logjistike është optimale, pasi mund të ruhet ne temperatura nga +2 gradë celsius deri në + 8 dhe e zhvilluar në siguri të plotë për platformat virale të njerëzve”, u shpreh Kirill Dmitriyev, kryetar i Fondit rus të Investimeve.

Javën e kaluar, pavarësisht skepticizmit nga BE, Hungaria u bë shteti i parë  evropian që aprovoi përdorimin e Sputnik V.