190 milionë euro barna nga jashtë, farmacitë ”mbyten” nga kërkesat, importi i maskave u rrit 3000%

Të dhënat e përpunuara nga Instituti i Statistikave, tregojnë se kërkesa për barna është rritur ndjeshëm gjatë vitit 2020, veçanërisht në muajin e fundit të vitit kur COVID-19, virozat rritën ndjeshëm shifrat e sëmundshmërisë në vend.

Krahasuar me vitin 2019 vlera e importeve të produkteve farmaceutike është rritur me afro pesë milionë euro, ndërsa të dhënat e siguruara nga Euronews zbulojnë se vetëm importi i maskave u rrit me 3000 për qind.

Pandemia COVID-19 kushtëzoi shumë sektorë të biznesit, por në krah të kundërt farmaceutika lulëzoi.

Që nga janari deri në 31 dhjetor u importuan rreth 190 milionë euro barna, me prurje të shtuara veçanërisht pas muajit mars, kur u diagonstikua edhe personi i parë me COVID-19. Pas maskave, edhe dezinfektantët u bënë ndër produktet më të kërkuara, dhe sasia më e madhe e këtyre në muajt e prill, maj, qershor.

Sipas të dhënave të përpunuara nga INSTAT, kërkesa të lartë ka pasur edhe antibiotikët, vitaminat, kortizonikët e holluesit e gjakut, të gjitha këto produkte që luftojnë COVID-19.

Ndërkaq, barnat e tjera kanë vazhduar në nivele të zakonshme.