Bushati: Rama po përdor kartën e përçarjes mes PD-LSI, Haxhiu: As të bashkuar nuk i prishin punë

Analistët Andi Bushati dhe Baton Haxhiu diskutuan në studion e emisionit ‘Shock’ në Euronews Albania lidhur me rolin dhe fatin e Lëvizjes Socialiste për Integrim në zgjedhjet e 25 prillit, pas deklaratës së bërë dy ditë më parë nga kryeministri Edi Rama se bashkë me kryedemokratin Basha, në 2017 kishin një projekt për ta çuar LSI-në për skrap.

Analist Andi Bushati u shpreh se kryeministri Rama po përdor kartën e përçarjes mes PD dhe LSI, projekt që siç tha kryeministri e nisi që gjatë fushatës së 4 viteve më parë, si e vetmja shpresë për të rikuperuar më shumë frikë për mosrealizimet e tij në 2 mandate.

Sipas tij, problemi është taktika e Ramës për t’i ndarë me çdo kusht, duke përdorur për këtë qëllim sondazhe si ato që e nxjerrin LSI 2,8 për qind, që nuk ka qenë kurrë.

Me gjithë problematikat e LSI si parti klienteliste dhe familjare, ajo sipas Bushatit, është një garanci për të mos e lënë pushtetin në dorë të një personi të vetëm.

 “8-vjeçari i mandatit të Ramës ka qenë një katastrofë për vendin. Por mandati më i mirë nuk ka qenë ky me tepsi, se sa ai me LSI. Në Shqipëri është më keq kur një njëri i vetëm merr gjithë pushtetet.

LSI garanci për të mos e lënë pushtetin në dorë të një banditi të vetëm”, tha Bushati.

Ndërkohë, për analistin Baton Haxhiu, Rama nuk ka nevojë ta përçajë PD-LSI pasi elektorati i PD ka një padurueshmëri ndaj atij të LSI pasi frytet e koalicionit i ka thithur LSI.

“Rama kur e ka kërkuar herën e kaluar tepsinë e plotë ka pasur parasysh lodhjen me LSI dhe natyrshëm LSI edhe në 2017 janë përpjekur ta shpërbëjnë.

Arsyeja pse LSI ka mbetur e tillë është se Basha taktikisht e bëri të pamundur të kalojë aq deputetë sa të lidhë marrëveshje me Ramën. Në zgjedhjet e kaluara duhet të kishte koalicion të përbashkët PS-PD. Fakti që PS fitoi 78 deputetë, mazhoranca e nevojshme, ishte i vështirë një koalicion me PD.

Gara në terren tregon se deklarata e Ramës kundër LSI nuk është i pambështetur”, tha analisti Haxhiu teksa shtoi se as të bashkuar LSI dhe PD nuk i prishin punë Ramës.

Ndiqni emisionin e plotë: