Josep Borrell vizitë tre ditore në Moskë, do të takohet me Sergei Lavrov

Josep Borrell, shefi për politikën e jashtme të BE-së është nisur në Moskë për një vizitë tre ditore, gjatë së cilës ai do të takojë homologun e tij rus, Sergei Lavrov.

Vizita bëhet gjatë kohës që është burgosur lideri i opozitës Alexei Navalny, i cili duhet që të vuajë një dënim me burg prej 2 vitesh e 8 muaj.

Liderët evropianë, duke përfshirë dhe vetë Borrell, e kanë dënuar këtë vendim të gjykatës ruse duke kërkuar lirimin e menjëhershëm të Navalny-t.

Marrëdhëniet midis BE-së dhe Rusisë kanë qenë të tensionuara gjatë dekadës së fundit.

BE ka denoncuar publikisht qeverinë e Vladimir Putin për një sërë çështjesh, të tilla si spiunazh, sulme kibernetike, fushata dezinformimi, shkelje në zgjedhjet elektorale si dhe helmime kimike.

Gjithashtu, unioni i vendeve evropiane i rinovon në mënyrë të vazhdueshme sanksionet e saj për Rusinë që nga aneksimi i rajonit të Krimesë në vitin 2014.

Lexoni gjithashtu:

Lideri opozitar rus pritet të mësojë vendimin, rrezikon disa vite burg

Gjykata dënon me burg liderin e opozitës ruse, Aleksei Navalny