Partizani fiton derbin e parë, “Të kuqtë” mposhtin Tiranën me rezultatin 2-1

Partizani është fituesi derbit të parë të kryeqytetit për këtë sezon. “Të kuqtë” mposhtën me rezultatin 2-1 ekipin e Tiranës, në një ndeshje që zgjati pothuajse 100 minuta. Të dyja skuadrat u treguan të kujdesshme në pjesën e parë, ndërkohë që nuk arritën të finalizonin në portën e njëra tjetrës.

Goli i parë erdhi vetëm në minutën e 78-të, kur pas një goditje nga këndi, Maguette dërgoi topin në rrjetë dhe zhbllokoi rezultatin.

Rezultati “shkundi” Tiranën, e cila u hodh në kërkim të golit të barazimit, duke e gjetur në minutën 90-të, me sulmuesin Florent Hasani.

Baraspesha zgjati vetëm dy minuta, pasi Partizani realizoi me Mensah, që devijoi topin e dërguar në zonë nga Keko.

Përpjekjet e ekipit “bardhe blu” nuk mjaftuan, pavarësisht se arbitri kishte përcaktuar tetë minuta lojë shtesë. Në fund, ishte Partizani që fitoi derbin e 200-të të kryeqytetit.