Kremtohet 101-vjetori i Tiranës si kryeqytet, ekspozitë me foto të ngjarjeve përpara vitit 1945

Ekspozita “Historia e Tiranës së vjetër përmes fotogtafive” shënoi 101-vjetorin e Tiranës kryeqytet, në mjediset e Kalasë së Tiranës ku u ekspozuan jo vetëm disa dhjetëra fotografi të rralla të fondit të AQSH-së, por edhe kartolina nga koleksionistët dhe objekte atuentike dhe elementë të veshjeve tiranase.

 Ardit Bido, drejtori i Përgjithshëm i Arkivave theksoi rëndësinë e datave të tilla për të treguar edhe çfarë ruhet në fondet arkivore, si një moment me rëndësi për kujtesën.

“101-vjetorin e Tiranës vendosëm ta kremtonim përmes kësaj ekspozite ku shfaqen imazhet e vjetra të kryeqytetit, para vitit 1945. Këtu tregohet një pjesë e historisë së tij, me ndërtesat historike me funksion publik, banesat e Tiranës, ngjarje dhe personazhe”, tha Bido.

Klodiana Toptani dhe Andi Seferi theksuan se kjo është një datë me rëndësi jo vetëm për kryeqytetin por për shqiptarët ndaj edhe duhet kujtuar në çdo formë. Ndërsa Mirela Bogdani, kryetare e Shoqatës “Tirana Intellectum” verën zhdukjen graduale të të vjetrës.

“Shumë nga këto fotografi që ne shohim sot kanë mbetur thjesht fotiografi pasi thuajse asgjë prej tyre nuk ekziston. Kjo është jo vetëm një ditë kujtese por edhe një moment për të bërë thirrje që të ruajmë atë që ende ka mbetur në kryeqytet”, tha ajo.

Ekspozita do të qëndrojë e çelur për disa ditë në Kalanë e Tiranës, në hapësirën publike të ekspozitave për cilindo që dëshiron të shohë Tiranën siç ka qenë, përmes fotografive, por edhe objekteve autentike.