Superiorja, Dritan Smajli shpreson te suksesi i Vllaznisë, por sheh si pretendentë edhe skuadra të tjera

Trajneri Dritan Smajli komentoi për Euronews Albania ndeshjen e javës së 19-të Tirana-Kukësi si ndeshje domethënëse për luftën për titullin kampion. Ai tha se për organikën që ka, skuadra e Tiranës është ngjashëm sa Kukësi për t’u konsideruar pretendente për titullin.

Për sa i përket Vllaznisë, Smajli, i cili ka qenë ish-futbollist i saj, tha se nuk pritej forma e tyre këtë sezon dhe nuk e fshehu dëshirën që klubi shkodran t’ia dalë deri në fund për t’u shpallur kampion i Shqipërisë pas 10 vitesh, titull që do të ishte i 10-ti në histori për këtë klub.

Smajli u ndal të komentonte edhe situatën e Partizanit. Ai tha se klubi kryeqytetas ka bërë disa ndërhyrje në merkato dhe nga ana tjetër ka një plan për t’u lavdëruar në punën me ekipet e moshave.

“Pas Vllaznisë, Partizani do të jetë kocka më e fortë,” – tha Smajli duke vlerësuar punën e Ilir Dajës.

Të kuqtë kanë angazhuar Albion Avdijajn, Salim Cissen, Elom Nya-Vedji, Milos Kalezic dhe Tim Brdaric duke u bërë një nga skuadrat më aktive në merkaton e dimrit.

Pas 18 javësh Vllaznia kryeson kampionatin me 37 pikë, ndjekur nga Partizani me 31 pikë, Laçi e Teuta me 30 dhe më tej Tirana e Kukësi me nga 26 pikë.

Ndërsa Tirana pret Kukësin këtë javë, Partizani luan ndaj Kastriotit ndërsa Vllaznia me Apoloninë. Shkodranët kanë tre javë pa fitore duke vënë në diskutim pozitat e tyre kryesuese.