Kosova pas zgjedhjeve, pritet të nisë numërimi i votave të emigrantëve

Zëdhënësi i Komisionit Qendror të Zgjedhjeve në Kosovë, Valmir Elezi tha se procesi i numërimit të votave të emigrantëve, atyre të personave me nevoja të veçanta dhe votat me kusht ende nuk ka nisur.

Ndërkohë pasi të mbarojë mbledhja e gjithë votave procesi i numërimit mund të zgjasë deri në dy ditë maksimumi.

“Aktualisht në qendrat e numërimit dhe rezultateve gjatë ditës së djeshme kemi përmbyllur procesin e pranimit të materialit zgjedhor në të gjitha komunat dhe njëkohësisht evidentimin e këtij materiali,” – tha Elezi.

Në intervistën për Euronews Albania, zëdhënësi i KQZ-së pohoi se futja në sistem e të dhënave nga vendvotimet është një proces i cili po merr goxha kohë.

Ndër të tjera ai tha gjithashtu se me shpalljen e rezultatit përfundimtar nuk përmbyllet procesi zgjedhor në Kosovë, pasi subjektet politike dhe kandidatët mund të paraqesin ankesat e tyre.

Elezi përmendi se KQZ-ja në Kosovë beson se ka arritur që pavarësisht ditëve të pakta në dispozicion për përgatitje,  procesi zgjedhor i ka bërë të ndihen vërtetë krenar.