Sondazhi| Të rinjtë serbë për luftërat: Faji i Perëndimit, të ndarë për gjenocidet

Të rinjtë në Serbi kanë një këndvështrim negativ mbi liderët e kohës së luftës të Serbisë, Kroacisë dhe Bosnje e Hercegovinës. Kështu thotë një studim i fundit i Nismës Rinore për të Drejtat e Njeriut, mbi figurat e Sllobodan Millosheviç, Franjo Tuxhman dhe Alija Izetbegoviç.

Opinionet janë të ndara edhe sa i takon rolit të komandantit të ushtrisë serbe, Ratko Mlladiç. Një në 4 të rinj beson se Perëndimi është përgjegjës për luftrat në Jugosllavi dhe po aq thonë se përgjegjës janë politikanët e tyre.

“Ka shumë injorancë sa i takon luftërave të viteve ’90 në Jugosllavi. Ndërsa në anën tjetër ka paragjykime të shumta të këtyre ngjarjeve në aspektin nacionalist,” – tha Marko Milosavljeviç nga Nisma Rinore për të Drejtat e Njeriut.

Qasjet negative ndaj Gjykatës së Hagës dhe proceseve për krime lufte në ish-Jugosllavi mund të shihen si bazat e qëndrimit të dy të tretave të të anketuarve, të cilët besojnë se Haga ishte një gjykatë politike dhe jo një institucion ligjor, ndërsa 41 për qind e të pyeturve mendojnë se qëllimi i saj ishte të fajësonte Serbinë për krimet e luftës.

Kur pyeten nëse në Srebrenicë ndodhi gjenocid, 38 për qind e të rinjve thonë ‘po’, 28 për qind ‘jo’, ndërsa pjesa e mbetur se nuk kanë njohuri të mjaftueshme.

“Ne po shohim se arsimi formal është shumë i rëndësishëm, pasi të rinjtë e sotëm nuk flasin për atë që ndodhi në vitet ’90. Ata duhet të kuptojnë se si ndodhën ato luftëra dhe cili është impakti i tyre në historinë moderne. Të rinjtë duhet të flasin për këto në mësimet e historisë dhe atëherë kur kjo nuk është e mundur, të zhvillojnë një bisedë me prindërit e tyre ose të konsultohen me mediat,” – u shpreh Miljana Pejiç nga Organizata për të Rinjtë e Serbisë.

Kur bëhet fjalë për marrëdhëniet mes Serbisë dhe Kosovës, një të tretat e të anketuarve thanë se Serbia duhet të vijojë me politikën e mosnjohjes së pavarësisë së Kosovës, 10 për qind thanë se Serbia duhet të rimarrë pushtetin në Kosovë edhe me anë të forcës, ndërsa 7 për qind se Serbia duhet ta njohë pavarësinë e saj.

LEXONI GJITHASHTU:

• Serbia bleu pikturën me motive shqiptare, Boshtrakaj: Ja nga frymëzohet piktori
• Serbia bleu pikturën me motive shqiptare/ Robert Aliaj: Ajo flet më shumë në Beograd