Kikia: Publiciteti i tepërt kthehet bumerang, nuk ka nevojë që kryeministri të shoqërojë çdo kuti me vaksina

Shqipëria ende nuk ka marrë një numër të konsiderueshëm të vaksinave kundër COVID-19, por rreth 46% e qytetarëve të pyetur në sondazhin e Euronews Albania dhe MRB, thonë se nuk do ta bënin një vaksinë të tillë.

Gazetarja Fatjona Mejdini e sheh këtë më tepër si një prirje e të rinjve, nën ndikimin e teorive konspirative dhe e lidhur me faktin se ata kanë besimin se preken më lehtë ose nuk preken nga virusi.

Kryeredaktori i Euronews Albania, Mentor Kikia e cilësoi si joserioz faktin që kryeministri Edi Rama pret në aeroportin e Rinasit çdo prurje të re vaksinash që vjen në vendin tonë.

Sipas tij, publicitet i tepërt, vjen një moment dhe shndërrohet në bumerang.

Zv. ministri i Shëndetësisë Albert Nikolla u shpreh se ekspertët e sistemit shëndetësor kanë qëndrim të prerë pro vaksinës.

Z. Nikolla bëri me dije se deri tani kanë marrë dozën e parë të vaksinave 7 mijë bluza të bardha dhe 900 të tjerë kanë marrë dozën e dytë.

Sipas tij, në vendin tonë pritet të vijnë 1,2 milionë vaksina nga COVAX duke nisur nga marsi, ndërkohë që është gati një kontratë për 360 mijë doza nga Astrazeneca.