Nënkalimi që shmang aksidentet, ARRSH nis punën për ndërtimin e veprës me vlerë 13.7 mln euro

Pas 15 muajsh rreth-rrotullimi problematik i njohur si rreth-rrotulimi i TEG, do të jetë një rrugë dytësore, pasi fluksi i automjeteve që i drejtohen Elbasanit apo Tiranës, do të qarkullojë në një nënkalim.

Autoriteti Rrugor Shqiptar ka nisur punën për zbatimin e projektit, vlera e të cilit shkon 1 miliard e 680 milionë ose e thënë ndryshe rreth 13.7 mln euro. Fillimisht punimet janë fokusuar në menaxhimin e trafikut duke vendosur sinjalistikën e nevojshme pasi janë reduktuar nga 3 në 2 korsitë ekzistuese, ndërsa drejtori i projekteve Erald Elezi ka shpjeguar për Euronews Albania detajet, si do të zgjidhet problemi i rreth-rrotullimit.

“Kemi pasur goxha shqetësim për fluksin e trafikut dhe numrin e madh të aksidenteve për shkak të zgjidhjes provizore si ajo aktualja përmes një rreth-rrotullimi.

Është hartuar projekti për ndërtimin e një nënkalimi, që do të thotë që fluksi më i madh drejt rrugës Tiranë-Elbasan të futet në nënkalim, në mënyrë që të jetë lëvizje e pandërprerë e trafikut”, u shpreh drejtori i projekteve në ARRSH, Erald Elezi.

Në fakt, fillimisht ARRSH parashikonte të ndërtonte mbikalim për të zgjidhur problemin në këtë aks, por pas studimit u vendos të ndërtohet nënkalim për shkak të kostos më të ulët por edhe për të ruajtur lartësinë e karrexhatës në harmoni në objektet përreth.