Erl Murati tregon faktorin që mund të rezultojë fatal për PD dhe LSI

Ndryshimet e njëanshme të Kodit Zgjedhor dhe Kushtetutës që mazhoranca qeverisëse bëri para zgjedhjeve parlamentare mund të rezultojnë fatale për opozitën thotë kryeredaktori i “Gazeta Shqiptare”, Erl Murati.

Analisti tha se pikërisht këto ndryshime bënë të pamundur daljen në një koalicion të PD dhe LSI dhe kjo gjë në ndarjen e mandateve mund t’i dëmtojë pasi sistemi aktual favorizon partinë më të madhe.

Sipas Muratit në rast të një situate të tillë, atëherë përgjegjësia do të jetë e liderit të opozitës duke iu referuar djegies së mandateve por edhe mos reagimi të fortë ndaj këtyre ndryshimeve.

“Dalja me dy lista e PD dhe LSI është një zgjidhje e sforcuar për shkak të ndryshimit të Kodit Zgjedhor dhe Kushtetutës. Ka një mundësi teorike që ndryshimi i Kushtetutës dhe Kodi Zgjedhor të rezultoi fatal për opozitën, por marr të mirëqenë të dy kampet të jenë me rezultat të përafërt me njëra-tjetrën, por për shkak të përkthimit të mandateve fiton PS. Fjala vjen nëse LSI merr 9 mijë vota në Qarkun e Elbasanit, këto janë vota të djegura, ndërsa po të ishin bashkë, me Kodin e vjetër, mund të përktheheshin në një mandat. Kjo mund të rezultoi fatale dhe nëse do të jetë kështu kjo është përgjegjësi direkte e z. Basha”, deklaroi kryeredaktori i GSH.al.

Ndërsa analistja Edlira Gjoni thotë se vëren se aleatët që PD ka afruar në koalicion nuk paraqesin vlerë të shtuar për opozitën, madje ai tha se liderët e tyre të pandryshuar mund të përcjellin një  efekt negativ.

“Aleatët e PD nuk kanë ndryshuar asgjë dhe kam përshtypjen që ka një efekt negativ. Por PD nuk e ka luksin që të humbi qoftë dhe një votë”, tha ajo.

Këtë ide e mbështeti dhe Neritan Sejamini, i cili deklaroi se me llogari elektorale PD e ndihmojnë qoftë dhe 100 vota ndërsa kur vjen puna për frymë ndryshon situata.