Broja në qendër të merkatos, cilat janë ekipet në garë për ta marrë

Pak javë më parë u kthye nga dëmtimi, ndërsa nuk pati fatin të vishte fanellën e kombëtares shqiptare në përballjet kualifikuese. Bëhet fjalë për Armando Brojën, sulmuesin e Chelsea-s, i cili po kalon një formë jo shumë të mirë në karrierën e tij. 22-vjecari është lojtari më i përfolur i kombëtares kuqezi, ndërsa është në qendër të merkatos së transferimeve.

Sipas asaj që mediat italiane bëjnë me dije, krahas West Ham dhe Fulham në kampionatin anglez, interes ndaj tij ka shprehur dhe Torino në Serinë A. Drejtuesit e klubit Italian kanë shprehur pëlqimin për Brojën, teksa siç dihet londinezët kurrsesi nuk dëshirojnë ta lënë të lirë. Kujtojmë këtu që më tepër do të preferohej një huazim brenda ligës nga ana e tyre, me West Ham dhe Fulham që qëndrojnë në pritje.

Broja nuk është i kënaqur me minutazhin e marrë, ndërsa Chelsea është skuadra e tij e zemrës, por për të rimarrë formën i duhet patjetër huazimi. Në këtë pikë, janari është dritarja e parë e cila do t’i japë drejtim rrugëtimit të 22-vjeçarit. Deri më tani nuk ka asgjë zyrtare nga klubet e sipërpërmendura, por në ditët në vijim pritet të ketë diçka konkrete, teksa do t’i takojë Brojës të marrë vendimin.