Vrasja e gazetarit disident, publikohet raporti amerikan që përfshin princin saudit në ekzekutim

Princi saudit i kurorës, Mohammed bin Salman aprovoi operacionin për kapjen ose vrasjen e gazetarit disident, Jamal Khashoggi, i cili u vra në vitin 2018.

Kështu thotë një raport i inteligjencës amerikane i publikuar të premten, pjesërisht i redaktuar për të kufizuar dëmet në marrëdhëniet mes Shteteve të Bashkuara dhe Arabisë Saudite.

Khashoggi, i cili jetonte në Amerikë dhe shkruante artikuj kritikë ndaj monarkisë saudite në “Washington Post”, u vra dhe iu copëtua trupi në konsullatën saudite në Stamboll, nga një grup agjentësh të lidhur me Salman.

Nga ana e tij, Rijadi zyrtar ka mohuar çdo përfshirje të princit, që është udhëheqësi de fakto i Arabisë Saudite.

“Ne vlerësojmë se princi i kurorës Muhammad bin Salman aprovoi një operacion në Stamboll për kapjen ose vrasjen e gazetarit Jamal Khashoggi”, thuhet në raportin e publikuar në faqen e internetit të Drejtorisë Kombëtare të Inteligjencës.

Dokumenti bazohet tek kapacitetet vendimmarrëse të princit, përfshirjen direkte në vrasje të një prej këshilltarëve të tij, tek detajet e operacionit, si dhe tek prirjet e monarkut për të ushtruar dhunë për t’u mbyllur gojën disidentëve.

Me zbardhjen e raportit, presidenti Joe Biden ktheu mbrapsht vendimin e paraardhësit të tij Donald Trump për të mos e publikuar atë, veprim që reflekton vullnetin e ri të Shteteve të Bashkuara për të sfiduar mbretërinë lidhur me çështjen e të drejtave të njeriut të luftës në Jemen.