SPAK përfundon hetimet për gjyqtaren Mimoza Margjeka, nën akuzë për korrupsion

SPAK ka përfunduar hetimet për gjyqtaren Mimoza Margjeka dhe grupin që akuzohen për korrupsion pasiv.  

Sipas SPAK, Mimoza Margjeka, Arben Cara, Nejton Bali, Klaudjo Zhilla dhe Skënder Demiraj janë nën akuzë për ‘korrupsion pasiv i gjyqtarëve në bashkëpunim’.

Në njoftimin e shpërndarë nga SPAK sqarohet se të pandehurit Nejton Bali, Klaudjo Zhilla dhe Skënder Demiraj, akuzohen se në bashkëpunim me njëri tjetrin, i kanë dhënë gjyqtares ndërkohë që ushtronte funksionet në Gjykatën e Apelit Korçë, nëpërmjet bashkëshortit të saj, Arben Carës, një shumë parash prej 6 000 eurosh, si përfitim të paligjshëm.

Kjo shumë parash, është dhënë me qëllim ndryshimin e masës së sigurimit nga ajo e “arrestit në burg”, në atë të “garancisë pasurore”,për Orion Balin.

Ky i fundit ishte arrestuar për veprën penale të “Ndihmë për kalim të paligjshëm të kufijve”.

Në shkëmbim të përfitimit të paligjshëm, ka rezultuar se Gjykata e Apelit Korçë ka ndryshuar masën e sigurimit nga ‘arrest në burg’ në atë të garancisë pasurore, për këtë shtetas.

Lexoni gjithashtu:

Ryshfeti 6 mijë euro, shtyhet seanca ndaj gjyqtares Mimoza Margjeka

GJKKO ndryshon masën e sigurisë për Arben Carën, burri i gjyqtares akuzohet për korrupsion