Kreu i Agjencisë Kombëtare të Mbrojtjes Civile paraqitet në SPAK

Drejtori i Agjencisë Kombëtare të Mbrojtjes Civile, Haki Çako, është paraqitur paraditen e kësaj të premteje në Prokurorinë e Posaçme kundër krimit të Organizuar dhe Korrupsionit.

Ende nuk dihen arsyet e thirrjes së kreut të Emergjencave Civile në SPAK.

Pasi përfundoi marrjen në pyetje në Prokurorinë e Posaçme, Çako deklaroi se u thirr në organin e akuzës në cilësinë e personit që ka dijeni për çështje që nuk lidhen as me detyrën e tij dhe as të institucionit që drejton.

Ai ka folur shkurtimisht dhe nuk ka zgjedhur të bëjë publike çështjen e cila po hetohet dhe për të cilën ai është marrë në pyetje si person që ka dijeni.

Kujtojmë se Haki Çako ka qenë ish-drejtor i Policisë së Shtetit prej vitit 2015 deri në vitin 2018.