SHBA po shqyrton rritjen e tarifave ndaj Kinës, në shënjestër industria e makinave

Shtetet e Bashkuara po shqyrtojnë rritjen e tarifave për automjetet elektrike kineze (EV) dhe mallra të tjera nga Kina, raportoi sot Wall Street Journal (ËSJ), duke cituar burime anonime.

Taksat amerikane për importin e makinave kineze janë aktualisht 25 për qind, dhe ato u vendosën nga ish-presidenti amerikan Donald Trump dhe u zgjatën nga kreu aktual i shtetit Joseph Biden, raporton Reuters.

Zëdhënësi i Ministrisë së Punëve të Jashtme të Kinës tha sot se vendi i tij do të monitorojë nga afër zhvillimet në SHBA dhe do të marrë masat e nevojshme për të “mbrojtur interesat e tij legjitime”.

Muajin e kaluar, ligjvënësit amerikanë i dërguan një kërkesë administratës së Presidentit Biden për të rritur tarifat për automjetet e prodhuara në Kinë dhe për të hetuar se si të parandalohen firmat kineze që të eksportojnë në SHBA nëpërmjet Meksikës.

Eksportet e makinave të Kinës janë rritur vitet e fundit për shkak të ngadalësimit të kërkesës së brendshme dhe kapacitetit të tepruar të prodhimit dhe pritet të rriten me 25 për qind vitin e ardhshëm krahasuar me vitin aktual, në 5.3 milionë automjete, sipas China Merchants Bank.

LEXONI GJITHASHTU:

• Dhjetëra njerëz ende të zhdukur nga tërmeti që la 137 të vdekur në Kinë
• Sa shqiptarë jetojnë në Kinë? Gazetari shqiptar merr nismën e veçantë…