Superliga, Skënderbeu mposht Partizanin, fitorja e parë pas 10 rezultatesh negative

Në javën e 23-të të kampionatit shqiptar të futbollit, skuadra e Skënderbeut befasoi duke mundur 1-0 Partizanin.

Juglindorët e drejtuar nga trajneri Migen Memelli arritën në “Elbasan Arena” fitoren e parë për këtë vit falë golit të brazilianit Jean Victor në minutën e 67-të.

Fitorja e tyre e fundit mbante datën 30 dhjetor 2020 dhe qe realizuar ndaj Bylisti 4-3. Më pas erdhën 10 ndeshje pa fitore, mes së cilave 4 barazime dhe 6 humbje, çka kanë vënë seriozisht në diskutim pozitat e Skënderbeut.

Të ashtuquajturit “Ujqërit e dëborës” janë bashkë me Bylisin dhe Apoloninë në rrezik rënieje nga kategoria – Bylis (vendi 8-të, 19 pikë), Skënderbeu (vendi 9-të, 16 pikë), Apolonia (vendi 10-të, 15 pikë).

Për Memellin, që e mori skuadrën më 3 shkurt, kjo fitore i ngjall moralin skuadrës, por kalendari parashikon ndeshje të vështirë. Më 13 mars ata do të luajnë ndaj Laçit të Shpëtim Duros që tashmë lufton për titull.

Nga ana tjetër Partizani i Ilir Dajës vihet seriozisht në pikëpyetje, pasi kjo ishte ndeshja e tretë radhazi pa fitore – një humbje, dy barazime. Ndërkohë më 13 mars parashikohet edhe derbi me Tiranën çka mund t’i nxjerrë ata nga lufta për titull.

Lexoni gjithashtu:

Superliga, Bylisi ndal Teutën, Tirana tjetër fitore para derbit me Partizanin