Vaksinimi i fëmijëve, Moderna nis të testojë vaksinën anti-COVID tek fëmijët nga 6 muaj në 12 vjeç

Kompania Moderna ka nisur të testojë vaksinën e saj anti-COVID edhe tek fëmijët nga 6 muaj në 12 vjeç.

Studimi do të vlerësojë sigurinë dhe efikasitetin e dy dozave të dhëna me një diferencë prej 28 ditësh dhe synon të marrë në testime rreth 6,750 fëmijë në Shtetet e Bashkuara dhe Kanada.

Vaksina tashmë është autorizuar për përdorim emergjent për të rriturit që janë mbi 18 vjeç. Në një studim i cili filloi në dhjetor, Moderna po teston gjithashtu vaksinën edhe tek adoleshentët nga 12 në 18 vjeç.

Vaksina e kompanisë amerikane ‘Moderna’ duket se funksionon edhe kundër varianteve të reja të coronavirusit, të zbuluara në Mbretërinë e Bashkuar dhe në Afrikën e Jugut.

Sipas shkencëtarëve, testet e hershme laboratorike sugjerojnë se antitrupat që nxit vaksina mund t’i njohin dhe luftojnë variantet e reja.

Megjithatë, shkencëtarët thonë se për ta konfirmuar këtë, duhet të bëhen më shumë studime. Ekspertët besojnë se varianti i Mbretërisë së Bashkuar, i cili është shfaqur në shtator, mund të jetë deri në 70% më i transmetueshëm.