EMRAT| Të akuzuar për trafik droge, ekstradohen nga Italia dhe Greqia dy shtetas

Ekstradohen në Shqipëri dy shtetas shqiptarë të akuzuar për veprimtari kriminale në fushën e narkotikëve.

Një 32-vjeçar u ekstradua nga Italia, i akuzuar si pjesë si pjesëtar i një grupi të strukturuar kriminal me veprimtari në fushën e narkotikëve, ndërsa nga Greqia është ekstraduar një 48-vjeçar, i akuzuar si organizator i trafikimit të një sasie lëndë narkotike kanabis, në Greqi.

Si rezultat i bashkëpunimit me Interpol Romën, është ekstraduar nga Italia, shtetasi Gjergji Luli, 32 vjeç. Ky shtetas ka qenë i shpallur në kërkim ndërkombëtar pasi GjKKO i ka caktuar masën e sigurisë “Arrest në burg”, për veprat penale “Prodhimi dhe shitja e narkotikëve”, “Grup i strukturuar kriminal” dhe “Kryerja e veprave nga grupi i strukturuar kriminal”.

“Shtetasi Gjergji Luli, në bashkëpunim me shtetasin A. L., dyshohet se ka transportuar dhe më pas i ka shitur një sasi lënde narkotike kokainë, për 200 000 euro, shtetasve R. Z. dhe Gj. Z., të cilët më pas e kanë trafikuar dhe shitur këtë sasi lënde narkotike, në zonën e Bergamos, Itali, në periudhën mars-nëntor të vitit 2016.

Gjithashtu, në janar të vitit 2017, në Bergamo, është sekuestruar edhe një sasi tjetër kokaine, që dyshohet se shtetasit Gjergji Luli dhe A. L. ia kishin shitur shtetasve R. Z. dhe Gj. Z..

Po si rezultat i bashkëpunimit me Interpol Athinën, është ekstraduar nga Greqia, shtetasi Arben Cufe., 48 vjeç. Ky shtetas ka qenë i shpallur në kërkim ndërkombëtar pasi, në vitin 2019, Gjykata i ka caktuar masën e sigurisë “Arrest në burg”, për veprën penale “Trafikimi i narkotikëve”, kryer në bashkëpunim.

Shtetasi Arben Cufe, në bashkëpunim me shtetasin V. H., dyshohet se ka organizuar trafikimin e një sasie lënde narkotike kanabis, në Greqi. Sasia e lëndës narkotike është transportuar në Greqi, kundrejt pagesës në euro nga 4 shtetas, të cilët janë arrestuar nga Policia.

2 shtetasit e ekstraduar në Shqipëri iu dorëzuan Drejtorisë së Përgjithshme të Burgjeve, për veprime të mëtejshme procedurale”, bën me dije policia.

LEXONI GJITHASHTU:

• Lokalizohen në Gjermani, ekstradohen drejt Shqipërisë dy të dënuar me burg (Emrat)
• Të shpallur në kërkim, ekstradohen në Shqipëri dy persona nga Serbia e Greqia