Gjysma e popullsisë së rritur në Mbretërinë e Bashkuar ka marrë një dozë të vaksinës anti-COVID

Gjysma e popullsisë së rritur në Mbretërinë e Bashkuar ka marrë një dozë të parë të vaksinës COVID-19, njoftoi Ministri i Shëndetësisë të shtunën, duke paralajmëruar një “sukses të madh” për vendin, i cili ka pasur numrin më të lartë të vdekjeve në Evropë gjatë pandemisë.

“Unë jam absolutisht i kënaqur t’ju them se tani kemi vaksinuar gjysmën e të rriturve në Mbretërinë e Bashkuar. Është një sukses i madh”, tha Matt Hancock në një video të postuar në Twitter.

Ai falënderoi ata që u përfshinë në fushatën e gjerë të vaksinimit që filloi në fillim të dhjetorit.

“Është kaq e rëndësishme sepse kjo vaksinë është rruga jonë për të dalë nga kjo pandemi”, tha ministri, duke inkurajuar popullsinë të vaksinohet.

Mbretëria e Bashkuar ka administruar më shumë se 26 milionë doza të para të vaksinave të koronavirusit.

Vetëm të enjten u injektuan 660,276 doza të vaksinës.

Ndërkohë, kryeministri Boris Johnson, 56-vjeç, mori një dozë të parë të vaksinës AstraZeneca të premten, pas konfirmimeve nga rregullatorët e Mbretërisë së Bashkuar dhe BE-së mbi sigurinë e saj.

Kryeministri u vaksinua në Spitalin “St Thomas” në Londër, ku kaloi tre ditë në kujdes intensiv në prill të 2020, pasi u infektua me COVID-19.

Lexoni gjithashtu:

Rikthehen izolimet, rritja e të infektuarve, Franca e Polonia në bllokim të pjesshëm