Guvernatori Gent Sejko: Turizmi është test sesi do të vijë rritja ekonomike

Guvernatori i Bankës së Shqipërisë, Gent Sejko teksa skanoi gjendjen ekonomike të vendit u shpreh se aktiviteti ekonomik pritet të stablizohet gjatë dy viteve të ardhshme.

Ai theksoi se këto janë parashikimet e bëra nga banka qendrore, por performanca ekonomike shtoi Sejko varet nga ecuria e pandemisë.

Guvernatori theksoi se viti që shkoi u mbyll me recesion, ndërkohë parashikoi se rritja ekonomike për këtë vit pritet të jetë në nivelin 4.9% .

“Viti i kaluar u mbyll me recesion. Në bazë të deklaratës së politikës monetare parashikojmë të kemi rritje ekonomike gjatë dy viteve në vijim. Rritja ekonomike për këtë vit parashikohet në 4.9% ndërsa vitin tjetër 4.1%”, theksoi Sejko.

Po ashtu ai tregoi se procesi i vaksinimit pritet të përmirësojë ndjeshëm treguesit ekonomikë në vend.

“Sa më shpejt të vaksinohet popullsia dhe të vaksinohet popullsia aq më shpejt do të përmirësohen dhe treguesit ekonomikë. Kursi i këmbimit shfaqet i qëndrueshëm. Nuk ka ndryshuar norma bazë për lekun. Turizmi është test sesi do të vijë rritja ekonomike. Pasiguritë janë të larta. Parashikimet ekonomike varen edhe nga pandemia. Politika jonë, për të promovuar monedhën kombëtare. Shtrëngimi i masave ndaj Covid ndikoi në punësim”, theksoi ai.