Strategjia e vaksinimit, Merkel mbron vendimet e BE-së, kërkon prodhim europian të vaksinës

Kancelarja Angela Merkel mbrojti vendimin e qeverisë së saj për të blerë së bashku me vendet e tjera anëtare të Bashkimit Evropian vaksinat anti-covid.

Në një fjalim para Bundestagut, Merkel nënvizoi se nëse do të dështonin në këtë proces blloku do të tronditej në themelet e tij.

“Pavarësisht nga të gjitha ankesat, ishte e drejtë të mbështeteshim në prokurimin e përbashkët dhe miratimin e vaksinave nga Bashkimi Evropian. Tani që ne shohim se edhe ndryshime të vogla në shpërndarjen e vaksinave shkaktojnë diskutime të mëdha, nuk do të doja të imagjinoja nëse disa shtete anëtare do të kishin vaksina dhe të tjerët jo. Kjo do të trondiste tregun e brendshëm. Ne duhet të supozojmë se virusi, me mutacionet e tij, mund të na pushtojë për një kohë të gjatë, kështu që çështja shkon përtej këtij viti”, u shpreh Merkel.

Kancelarja theksoi edhe njëherë nevojën e prodhimit të vaksinës në BE.

“Ajo që duhet bërë është sigurimi i prodhimit në territorin europian. Në Britaninë e Madhe prodhohet për Britaninë e Madhe, SHBA nuk eksporton vaksina. Prandaj jemi të varur për një kohë të gjatë nga ajo se çfarë prodhohet në Europë. Në të njëjtën kohë, duhet bërë më shumë për të siguruar që pjesa tjetër e botës të furnizohtj me vaksina,  përndryshe mutacione e reja do të vijojnë të shfaqen”, u shpreh ajo më tej.

Presioni është shtuar mbi vendet anëtarë të BE pasi vendet e tjera, si Britania e Madhe,  kanë ritme shumë të shpejta të vaksinimit.

Komisioni Evropian po kërkon kontroll të shtuar në eksportet e vaksinave.

Komisioni Evropian ka fajësuar kompanitë farmaceutike – kryesisht AstraZeneca – për mosdorëzimin e dozave të premtuara.

Brukseli ka thënë se nga më shumë se 40 milionë doza të eksportuara nga BE gjatë dy muajve të fundit, një e katërta u dërguan në Mbretërinë e Bashkuar.

Mbretëria e Bashkuar dhe BE janë shprehur  se duan “krijonin një situatë të favorshme dhe të zgjeronin furnizimin e vaksinave për të gjithë”.

Lexoni gjithashtu:

Sputnik V shkakton krizë politike në Sllovaki, kërkohet dorëheqja e kryeministrit KOMENTE