U zëvendësua një ditë më parë, Zelensky: Ish-shefi i ushtrisë, “Hero i Ukrainës”

Presidenti i Ukrainës, Volodymyr Zelensky e ka cilësuar ish-shefin e ushtrisë, gjeneralin Valeriy Zaluzhny, një “hero të Ukrainës”, një ditë pasi ai u zëvendësua.

Sipas mediave të huaja, vendimi për t’i dhënë çmimin më të lartë shtetëror të Ukrainës Zaluzhny u njoftua në një dekret në faqen e internetit të presidentit dhe vjen pasi figura e njohur, e cila mbikëqyri përpjekjet e luftës të Ukrainës gjatë gjithë pushtimit rus, u zëvendësua nga gjeneralkoloneli Oleksandr Syrskyi.

Ndryshimet ushtarake pasuan muaj të tërë spekulimesh për një përçarje midis dy figurave më të shquara të kohës së luftës të Ukrainës mbi vizionet e tyre për luftën kundër Rusisë.

Sondazhet kanë treguar se Zaluzhny ka një pjesë më të madhe të besimit të publikut sesa lideri ukrainas.

Kujtojmë se prej 24 shkurtit të dy viteve më parë, mijëra persona kanë humbur jetën në Ukrainë, civilë e ushtarakë, si pasojë e një agresioni të pajustifikuar nga ana e Rusisë ndaj fqinjit të saj perëndimor.

LEXONI GJITHASHTU:

• Zelensky emëron komandantin e ri të ushtrisë ukrainase
• U emërua nga Zelensky, kush është shefi i ri i Ushtrisë së Ukrainës me origjinë ruse