Kreu i Transportit Urban: Autobusët vonohen nga trafiku, jo se nuk janë të shumtë

Kreu i Shoqatës së Transportit Urban, Dashnor Mema, është shprehur se urbanët në Tiranë vonohen jo për shkak të numrit të tyre, por për shkak të trafikut të rënduar.

Komentet Mema i bëri në emisionin “Good Morning Albanians” në Euronews, ku tregoi se kush janë linjat më të rënduara dhe ato me më pak trafik.

Ai tha se sado autobuzë të nxirren në rrugë, nëse trafiku do të jetë i rënduar, sërish ata nuk do të mbërrijnë në destinacion në kohën e duhur.

“Kanë probleme rrugët kryesore që kanë edhe trafikun më të dendur. Nuk e parashikojmë dot se në çfarë minutash do të mbyllet një cikël i autobuzit. Një cikët nëse nuk ka një trafik të rënduar, mbyllet në kohën që duhet të mbyllet. Ne sado mjete të nxjerrim në rrugë, nëse do të ketë trafik, është e paarritshme në kohë, që të mbërrijë në vendin e duhur.

Trafik të rënduar kanë linjat Institut-Qendër, është Tirana e Re, është linja e Kombinatit, janë linja që kanë edhe fluksin edhe më të madh. Edhe Tiranë-Sauk ka trafik të rënduar. Edhe linjat nga Vora nga rrugët dytësore, është e rënduar. Pak më të qeta janë linjat e Freskut dhe Brrylit.

Ne sikur të nxjerrim edhe aq autobuza sa kemi, nëse do të ngecin në trafik, sërish do të vonohet. Unë nëse transporti publik do të ketë garancinë, sigurinë dhe shpejtësinë, do ta përdor transportin publik”, tha Mema.

LEXONI GJITHASHTU:

• Transporti urban në Shkodër, 24 orë jashtë funksionit
• Përfaqësuesi i Transportit: 200 urbanë janë në Tiranë, duhen më shumë