“Lashë shokun në luftë”, deputeti i PS debaton me Abilekajn për armët e ushtrisë

Deputeti i PS Denis Deliu debatoi me gazetarin Enton Abilekaj në emisionin Now lidhur me gjendjen e ushtrisë shqiptare.

Deliu solli në vëmendje se ai vetë i ka shërbyer atdheut në luftë dhe madje shoku i tij Feti Vogli ra dëshmor, ndërsa theksoi se sot, ndryshe nga koha kur ai shërbente në FA, ka një trajtim dinjitoz ndaj forcave të armatosura të Shqipërisë.

“Jam ndër ata njerëz që i ka shërbyer atdheut në luftë dhe kam edhe dëshmor shokun tim, kapiten Feti Vogli. Ushtria shqiptare, po edhe vete politika në mendësinë e saj e kishte bazuar gjithçka në anëtarësimit në NATO dhe pastaj na mbron NATO. Me nisjen e luftës së Rusisë po ndryshon mendësia politike e Evropës. Burimet tona njerëzore kanë qenë më të keqpaguarit, ka nga ata që kanë bërë kërkesë dhe janë larguar nga FA për shkak të trajtimit jo dinjitoz. Sot pagat e ushtarakëve janë rritur me 37 për qind dhe është rikthyer ushqimi, që ishte hequr me vendim te qeverisë Berisha në 2013. Një nga arsyet që ju bashkova politikës është kjo. Kur shërbeva në luftë dhe humba shokun, ne nuk trajtoheshim ashtu siç duhej, dhe unë jam sot një zë i fortë për të gjithë kolegët e mi”, tha Deliu.