“Xcel Energy” mund të jetë përgjegjëse për zjarrin më të madh në historinë e Teksas 

Kompania amerikane e furnizimit me energji elektrike “Xcel Energy” njoftoi sot se mund të jetë përgjegjëse për zjarrin më të madh në historinë e shtetit të Teksasit.

“Bazuar në informacionet e disponueshme aktualisht, Xcel Energy pranon se është e mundur që objektet e saj të jenë përfshirë në zjarrin e Smoukhouse Creek”, thuhet në deklaratë, sipas Washington Post.

Kompania, e cila u shërben afro katër milionë përdoruesve të energjisë elektrike në disa shtete amerikane, shtoi se po bashkëpunon me autoritetet shtetërore për të hetuar shkakun e zjarrit.

“Ne inkurajojmë njerëzit, pronat e të cilëve u shkatërruan ose ata që humbën bagëtinë në Smokehouse Creek Fire, të paraqesin një kërkesë në Xcel për kompensim”, shkruan ata në një deklaratë.

“Smokehouse Creek” prej gati dy javësh ka përfshirë Teksasin dhe në fillim të marsit u shpall zjarri më i madh që ka përfshirë ndonjëherë atë shtet amerikan.

Zjarri ka përfshirë rreth gjysmë milioni hektarë të territorit të Teksasit dhe deri më tani janë raportuar dy të vdekur.

LEXONI GJITHASHTU:

• Mijëra bagëti digjen në zjarrin më të madh në historinë e Teksasit 
• Departamenti i Drejtësisë i SHBA-së padit Teksasin, shkak barrierat lundruese