S’ka prova që lidhin vaksinën e AstraZeneca-s me vdekjet në Austri, pohon Agjencia Evropiane e Barnave

Agjencia Evropiane e Barnave tha të mërkurën se aktualisht nuk ka prova që lidhin vaksinën AstraZeneca-s me sëmundjet e zhvilluara nga dy persona në Austri,  të cilët ishin vaksinuar.

Autoritetet shëndetësore austriake pezulluan përdorimin e një grumbulli vaksinash AstraZeneca të dielën, pasi një grua 49-vjeçare vdiq si rezultat i trombozave të shumta, 10 ditë pasi u injektua.

Një 35-vjeçar gjithashtu u shtrua në spital, i cili kishte probleme me mushkërinë, pasi mori vaksinën.

Por, Agjencia Evropiane e Barnave tha në një deklaratë të mërkurën se një hetim paraprak tregoi se “aktualisht nuk ka tregues se vaksinimi i ka shkaktuar këto probleme, të cilat nuk renditen si efekte anësore me këtë vaksinë”.

Sipas rregullatorit, saisa e vaksinave të Astrazenca-s përmbante 1 milion doza, të cilat u shpërndanë në 17 vende të BE-së përfshirë Austrinë, Bullgarinë, Qipron, Danimarkën, Estoninë, Francën, Greqinë, Islandën, Irlandën, Letoninë, Lituaninë, Luksemburgun, Maltën, Hollandën, Poloninë, Spanjën dhe Suedinë.

AstraZeneca është një nga tre vaksinat e aprovuara aktualisht për t’u përdorur në 27 vendet anëtare të BE së bashku me vaksinat e zhvilluara nga Pfizer/BioNTech dhe Moderna.

Agjencia Evropiane e Barnave pritet të miratojë edhe vaksinën Johnson & Johnson.