Një vit pandemi, por kur përfundon? Jeta ndryshoi, 11 mars 2020 OBSH shpalli COVID-19 pandemi globale

Më 11 mars të vitit 2020 e gjithë bota do të hynte në një cikël të ri, me plot pasiguri dhe frikë nga i cili ende nuk ka shpëtuar ndonëse kemi mësuar më shumë.

Pikërisht një vit më parë Organizata Botërore shpalli COVID-19 një pandemi globale, pasi virusi SARS-CoV-2  kishte pushtuar thuajse çdo cep të botës e kur dita ditës shtohej frikshëm numri i të infektuarve por edhe viktimave.

Një virus që nisi në një qytezë të Kinës, në Wuhan e që më pas nuk kurseu asnjë vend të botës. Bota heshti.

“Në ditët dhe javët në vijim presim të shohim rritje të rasteve, shifra të vdekjeve dhe shifra të vendeve të prekura që shtohen edhe më shumë. Tanimë rreziku i një pandemie është bërë real. Ne kurrë më parë nuk kemi parë një pandemi të shkaktuar nga një koronavirus.”

Ishte kjo deklarata e kreut të Organizatës Botërore të Shëndetësisë një vit më parë. Shumë ekspertë të cilët kanë kritikuar OBSH-në se vonoi të shpallte gjendjen e pandemisë kanë thënë se kjo ka të ngjarë të jetë pandemia më e keqe në një shekull, pasi ka përmbysur jetën e njerëzve globalisht dhe ka bërë krahasime me pandeminë spanjolle të gripit të vitit 1918,  përgjegjëse për dhjetëra miliona vdekje.

Globalisht deri më sot  kanë humbur jetën 2.6 milionë persona e janë infektuar 118 milionë të tjerë.

Pas një viti krahas kufizimeve që vijojnë, rregullave strikte të higjienës, mbajtjes së maskës kudo, ndalimit të qarkullimit, të cilat u panë si një mjet për të luftuar COVID-19, ka nisur procesi i vaksinimit me disa vaksina çka ka shtuar shpresat se COVID-19 shumë shpejt do të jetë thjesht një sëmundje e kurueshme por që do të mbetet në kujtesën e të gjithë brezit që e përjetoi.