Sekuestrohen 1118 kg kokainë në Greqi, arrestohen 8 persona, shumica prej tyre shqiptarë

Një sasi rekord prej 1118 kilogramë kokainë është sekuestruar në Greqi të premten, në një operacion ndërkombëtar antidrogë ku është përfshirë edhe DEA amerikane. Sipas policisë greke, 8 persona janë arrestuar dhe shumica e tyre janë shqiptarë. Aksioni është zhvilluar në Astako, një qytet port në Greqi. Personat e arrestuar kishin marrë me qira disa dhoma në një kompleks banesash, ku edhe kishin fshehur lëndën narkotike.

Sipas hetimeve të zhvilluara nga DEA dhe autoritetet greke, kokaina ishte nisur nga ishulli i Shën Vincentit në Karaibe. Në njoftimin për mediat policia thekson se destinacioni përfundimtar i drogës ishin vendet e Bashkimit Evropiane dhe ato të Afrikës Perëndimore.

Nuk është operacioni i vetëm i zhvilluar nga DEA dhe prokuroria greke ku sekuestrohen sasi të madha kokainë dhe shqiptarët janë trafikantët.

Në shtator të vitit të kaluar, në portin e Pireut u sekuestruan 137 kilogramë kokainë. Destinacioni i saj fillimisht ishte Shqipëria dhe më pas do shpërndahej në vendet e Evropës. Në vendin tonë u arrestuan dy persona , ndërsa pritësi arriti t’i shpëtojë ndjekjes së policisë.