Italia hyn në izolim, hapet Portugalia. Spanja nis sezonin turistik

Në Itali u pastruan rrugët nga festimet e qytetarëve, të cilët gëzuan të dielën orët e fundit të lirisë.

Gjysma e rajoneve të vendit kanë hyrë sërish në izolim të ashpër, në përpjekje për të frenuar valën e tretë të pandemisë së coronavirusit, që ka çuar shtrimet në spitale përtej kapaciteteve.

Shkollat dhe dyqanet u mbyllën në 9 rajone dhe në provincën e Trentos, me restorantet që funksionuan vetëm për ushqime me vete.

Ndërkohë, Portugalia po del nga një izolim 2-mujor, me vendin që do të rihapet gradualisht në 7 javët e ardhshme, nëse gjithçka shkon sipas planeve.

Shkollat fillore dhe kopshtet, sallonet e bukurisë dhe libraritë janë mes subjekteve që u rihapën të hënën.

Biletat për në Majorka për periudhën e Pashkës u shitën brenda pak orëve, pasi Gjermania hoqi karantinën për qytetarët që ktheheshin nga ishujt e Spanjës.

Sidoqoftë izolimi në Gjermani do të mbetet në fuqi të paktën deri në fund të marsit dhe hotelet nuk presin dot turistë që prej nëntorit.

Kompania vartëse e “Lufthansa”, “Eurowings”, ka shtuar 300 fluturime të tjera drejt ishujve spanjollë për shkak të rritjes së kërkesës.

Moti i mirë dhe hapja e plazheve ka sinjalizuar fillimin e sezonit turistik në Valencia.

Qytetet Benidorm dhe Gandia kanë hapur tashmë dyert, i pari me mbi 6 mijë ngastra shezlongësh në rërë dhe i dyti gati për të pritur mbi 50 mijë persona përgjatë vijës së tij bregdetare. Sidoqoftë, vizitorët duhet të jenë të pajisur me testin që ka rezultuar negativ.