Ligjvënësit gjermanë akuzojnë AfD-në për përhapje të propagandës ruse

Ligjvënësit gjermanë nga mbarë spektri politik akuzuan partinë e ekstremit të djathtë, Alternativa për Gjermaninë (AfD), për përhapje të propagandës ruse dhe për minim të sigurisë së Gjermanisë.

Debati parlamentar i 11 prillit u thirr pas raportimeve për fushatë dezinformuese ruse dhe raportimeve për lidhje të mundshme të kësaj fushate me politikanët nga AfD-ja.

Qeveria e Çekisë ka vendosur sanksione ndaj platformës proruse në internet, Zëri i Evropës (VoE). Ky rrjet kihte publikuar intervista me politikanët e AfD-së, Petr Bystron dhe Maximilian Krah.

Gazeta çeke, Denik N, citoi ministra të paidentifikuar dhe zyrtarë të inteligjencës, që raportohet se thanë se Bystron mund të ketë pranuar para nga platforma proruse.

Bystron ka mohuar akuzat.

Irene Mihalic, politikane nga Partia e Gjelbër, tha se AfD-ja paraqet rrezik të sigurisë për shtetin gjerman.

Edhe pse Bystron mund të gëzojë nga prezumimi i pafajësisë, tha ajo, partia si tërësi e ka bërë të qartë se ku qëndron ndaj presidentit rus, Vladimir Putin.

“Qoftë nëse është paguar ose jo, zonja dhe zotërinj, sa i përket lidhjeve të AfD-së me Rusinë e Putinit, kjo parti që një kohë të gjatë ka humbur pafajësinë e saj”.

Politikanët nga Socialdemokratët e qendrës së majtë (SPD), Të Gjelbrit, Demokratët e Lirë, CDU/CSU nga qendra e djathtë, që të gjithë kritikuan udhëtimet e politikanëve të AfD-së në Rusi dhe Bjellorusi në cilësinë e vëzhguesve zgjedhorë dhe vizitat në Ambasadën ruse në Berlin.

Ata po ashtu akuzuan AfD-në se po përhap propagandën e luftës të Rusisë.

Dirk Wiese nga SPD-ja e quajti AfD-në “megafon të Kremlinit” dhe u tha ligjvënësve të kësaj partie: “Aplikoni për ulëse në Dumën shtetërore ruse. Ato interesa përfaqësoni ju, aty e keni vendin”.

Në Gjermani, Putin ka gjetur “idiotët dhe zbatuesit e tij në AfD”, tha Christoph de Vries, ligjvënës nga CDU-ja.

Ligjvënësi nga AfD-ja, Stefan Keuter, i doli në mbrojtje partisë së tij. Ai akuzoi partitë e tjera se po tentojnë të fitojnë poenë politikë me këto sulme, duke e cilësuar si “fushatë shtrigash” të gjithë këtë ngjarje dhe duke mbrojtur Bystronin që tha se është i pafajshëm.

“Ata nuk kanë asnjë provë, dhe po tentojnë të dëmtojnë një njeri familjar”, tha ai.

LEXONI GJITHASHTU: 

• Pjesëmarrëse në organizatë terroriste, GJKKO dënon gratë e riatdhesuara nga Siria
• Lexohen raportet për Xhaçkën, Bardhi: Nëse heshtni sot, hodhët në kosh Kushtetuesen