Pjesëmarrëse në organizatë terroriste, GJKKO dënon gratë e riatdhesuara nga Siria

Gjykata e Posaçme Antikorrupsion dha dënimin për 9 gratë e riatdhesuara nga Siria, të cilat akuzohen për “pjesëmarrje në organizatë terroriste” dhe “pjesëmarrje në veprimtari luftarake në një shtet të huaj”.

Gjyqtarja Rudina Palloj pranoi kërkesën e prokurores Elida Kaçkini, duke shpallur fajtore nëntë të pandehurat dhe vendosi dënimin e secilës prej tyre me 7 vite burg. Me aplikim të gjykimit të shkurtuar, dënimi zbriti në 4 vite e 8 muaj heqje lirie.

Prokuroria e Posaçme kërkoi pezullimin e dënimit për secilën dhe vendosjen e tyre në shërbim prove për 5 vite. Po ashtu me kërkesë të Kaçkinit, togat e zeza vendosën heqjen e masës së sigurisë që i ndalon të pandehurat të dalin jashtë territorit të vendit.

Palloj gjithashtu urdhëroi që të 9 personat të mos shoqërohen me askënd që është hetuar apo dënuar për vepra të tilla penale si dhe të mos frekuentojnë ambiente me individë që kanë qëndrime radikale.

Gjatë vitit 2013-2014 të nënta gratë u larguan në drejtim të Sirisë, pasi ndoqën bashkëshortët e tyre, të cilët shkuan të luftonin përkrah Al Nusras dhe më pas për ISIS.

Nga hetimet e Prokurorisë së Posaçme Antikorrupsion, rezulton se të gjitha të pandehurat iu bashkuan me vullnet të plotë dy organizatave terroriste në Siri.

LEXONI GJITHASHTU: 

• Ushtria izraelite po ndërton një kalim të ri kufitar për futjen e ndihmave në Gazë
• Tabaku: Qeveria ka dështuar në konkurrencë me rajonin. Të fundit, më të varfërit!