Sulmi rus vret 17 persona, mbi 60 të plagosur në qytetin Çernihiv

Një sulm me raketa ruse ka vrarë të paktën 17 persona në qytetin Çernihiv, në veri të Ukrainës.

Ministria e Brendshme në Kiev raportoi se nga i njëjti sulm mbi 60 persona të tjerë kanë mbetur të plagosur.

Raketat goditën një godinë 8-katëshe në afërsi të qendrës së qytetit, disa orë pasi pala ukrainase kishte goditur një bazë ajrore ruse në Krimenë e pushtuar.

Të dhënat e Kievit zyrtar duhet ende të konfirmohen, edhe pse video të publikuara në rrjetet sociale tregojnë një zjarr të rënë në pistën e lokalitetit Dzhankoj, në veri të Krimesë, ku thuhet se kanë vdekur disa ushtarë rusë.

Në Çernihiv, autoritetet lokale deklaruan se nga sulmi rus, i kryer me 3 raketa, kishin mbetur të dëmtuara 5 godina të larta, një spital, automjete dhe një institucion shkollor.

Ministri i Brendshëm ukrainas bëri të ditur se mes të vdekurve janë edhe dy fëmijë dhe se policia po kërkon nën rrënoja për viktima të tjera.

Presidenti Volodymyr Zelensky, në reagimin e tij tha se sulmi rus nuk do të kishte ndodhur nëse Ukraina do të kishte marrë pajisje të mjaftueshme për mbrojtjen ajrore dhe përsëriti apelin drejtuar aleatëve perëndimorë për mbështetje.

I mbledhur këtë të mërkurë, Këshilli Evropian ka nënvizuar rëndësinë për të furnizuar urgjentisht Ukrainën me sisteme të mbrojtjes ajrore dhe për të përshpejtuar procesin e asistencës së nevojshme ushtarake, me municione artilerish dhe raketa.

LEXONI GJITHASHTU:

• Ishin lëshuar mbi Ukrainë, Kievi rrëzon 9 dronë të Rusisë
• SHBA: Kina po rrit shitjet e pajisjeve që Rusia përdor për të prodhuar armë