Akuzat për spiunazh me Kinën, eurodeputeti gjerman: Do kandidoj në zgjedhje

Euro-deputeti ekstremist gjerman, Maximilian Krah ka deklaruar se nuk do të tërhiqet nga kandidimi në zgjedhjet evropiane të qershorit, pavarësisht se asistenti i tij u arrestua për spiunazh në favor të Kinës. Krah, nga radhët e Alternativës për Gjermaninë, ka thënë se ka mbështetjen e krerëve të partisë.

“Jam dhe do të mbetem kandidati lider. Me rëndësi tani është të fokusohemi tek fushata për çështjet evropiane dhe të distancohemi nga ato të pakëndshme të ndodhura së fundmi. Duhet të kemi parasysh se unë nuk mund të akuzohem për sjellje të keqe personale. Një krim është kryer nga stafi im dhe më duhet të pranoj se ka një nivel të lartë dyshimi. Kjo nuk është aspak e këndshme dhe është në interesin tim të pastroj rrëmujën”, tha Maximilian Krah, euro-deputet nga Alternativa për Gjermaninë.

Asistenti i Krah, Jian Guo, akuzohet se i ka kaluar Kinës informacione mbi punët e Parlamentit Evropian. arrestimi i tij ditën e martë erdhi pasi tre shtetas gjermanë të tjerë ishin arrestuar për akuza të ngjashme.