Gjysmëfinalet e Europa League, Roma ëndërron finalen përballë të “pamposhturve”

Emocionet e futbollit në kontinentin e vjetër vijojnë këtë të enjte në Europa League, me dy përballje që priten me shumë interes. Roma e transformuar nën drejtimin e De Rossit ëndërron finalen, por për këtë duhet të thyejë të pamposhturit e Evropës, Leverkusenin. Në Francë, Marseja pasi përmbysi Benfikën beson se mund ta bëjë këtë dhe ndaj Atalantës, por bergamaskët duhen pasur frikë, pasi eliminuan pretendentin kryesor, Liverpoolin.

Sfida që garantojnë spektakël jo vetëm nga forma e skuadrave, por dhe vetë faza në të cilën ndodhet kompeticioni. Roma dhe Leverkusen janë përballur 6 herë në Champions dhe Europa League ku 2 fitore i takojnë italianëve, 1 aspirinave dhe 3 barazime. Dueli i fundit direkt ai në 2023, ku aspirinat u eliminuan nga ky kompeticion pikërisht mga Roma e Mourinhos.

Çelik, Lukaku e Smalling janë mungesat e vendësve, ndërsa Iglesias tek Leverkusen, me dyshen Hlozek-Tah në dyshim.

Në anëm tjetër Marseja e Atalanta ndeshen për herë të parë, për ti hapur rrugë dueleve mes tyre, me francezët që cilësohen si më favoritë. 5 lojtarë do të mungojnë tek vendësit, por edhe Gasperini nuk ka në dispozicion 3 prej tyre.