Cameron: Ukraina mund të përdorë armë britanike brenda Rusisë. Moska: E rrezikshme!

Sekretari i Jashtëm i Mbretërisë së Bashkuar Lord Cameron ka thënë se i takon Ukrainës të vendosë se si të përdorë armët britanike dhe këmbënguli se ajo ka të drejtë të godasë objektivat në territorin rus.

Sipas mediave të huaja, komentet Cameron i bëri gjatë një vizite në Kiev, ku tha se Mbretëria e Bashkuar do të sigurojë 3 miliardë paund (3.75 miliardë dollarë) në vit për aq kohë sa të jetë e nevojshme.

“Ashtu si Rusia po godet brenda Ukrainës, ju mund ta kuptoni plotësisht pse Ukraina ndjen nevojën për t’u siguruar që po mbrohet,” tha Lord Cameron.

Rusia dënoi atë që e quajti “një deklaratë tjetër shumë e rrezikshme”.

“Ky është një përshkallëzim i drejtpërdrejtë i tensionit rreth konfliktit të Ukrainës, i cili potencialisht do të përbënte një kërcënim për sigurinë evropiane”, tha zëdhënësi i Kremlinit, Dmitry Peskov.

SHBA thuhet se i ka kërkuar Ukrainës që të ndalojë sulmet e saj ndaj rafinerive të naftës në Rusi, nga frika se mund të provokojë një përshkallëzim në konflikt.

Peskov gjithashtu sulmoi presidentin francez Emmanuel Macron, i cili tha këtë javë se Perëndimi “në mënyrë legjitime”do të duhej të konsideronte nëse do të dërgonte trupa tokësore në Ukrainë “nëse rusët do të kalonin vijën e frontit, nëse do të kishte një kërkesë ukrainase”.

LEXONI GJITHASHTU:

• Peskov: Bisedimet për Ukrainën pa pjesëmarrjen e Rusisë nuk synojnë rezultat
• SHBA e akuzoi se po përdor armë kimike në Ukrainë, përgjigjet Kremlini