Gara e Ermir Gjinishit në Elbasan: Pse zgjodha Lëvizjen Socialiste për Integrim

Kandidati për deputet i LSI-së në qarkun e Elbasanit, Ermir Gjinishi, teksa shpjegoi arsyet që e kanë shtyrë të merret me politikë thotë se ky qark vuan nga problematika të formave të ndryshme.

Sipas tij, në Elbasan mund të gjesh të gjitha dëshmimet e qeverisë aktuale të drejtuar nga kryeministri Edi Rama.

“Qarku i Elbasanit është qarku im, unë aty kam rrënjët e mia historike dhe kulturore. Jam tek habitati im, vendim im dhe rrënjët e mia. Në Elbasan mund t’i gjesh të gjitha dështimet e kësaj qeverie”, tha ai.

Përballë gazetares Ilva Tare, z. Gjinishi u shpreh i trishtuar në lidhje me përbërjen e sotme të Kuvendit të Shqipërisë.

“Unë nuk mund ta duroj dot nivelin e ulët të politik-bërjes në Parlamentin shqiptar. Jam tmerrësisht i prekur kur dëgjoj gjatë këtyre viteve njerëz në parlament, të cilat nuk dinë të lexojnë dhe janë analfabetë, këtë janë politik-bërësit dhe vendosin për fatin e vendit. Nuk ka vlerë asgjë individuale nëse vendi yt nuk shko atje ku duhet. Nuk mund ta ndaj interesin personal me interesin e vendit”, tha ai.

Ai listoi arsyet kryesore, të cilat e kanë bindur që të hyjë dhe të garojë në listat e Lëvizjes Socialiste për Integrim.

“Nuk kam qenë asnjëherë pjesë e asnjë partie. Unë kam besuar se Edi Rama do ishte kryeministër ndryshe. Pse shkova te LSI? E para, unë mendoj se pluralizmi në një vend demokratik fillon me partitë. LSI është një lëvizje, është parti shumë e hapur dhe në listat tona sheh njerëz të spikatur. Një parti e lidhur me rininë, ndërsa sot ne krizën më të madhe kemi largimin e të rinjve. Unë e shikoj veten mjaft mirë”,  tha ai.

LEXONI GJITHASHTU:

• Ermir Gjinishi: Në tetë vite qeverisje të PS-së, Elbasani vetëm kronikë e zezë
• Ermir Gjinishi: LSI lufton për katër mandate në Elbasan
• Ermir Gjinishi: Dy muajt fundit nuk i ndryshojnë gjë tetë viteve qeverisje të PS