Gjykata gjermane miraton përgjimin e AfD-së, si një parti potencialisht ekstremiste

Gjykata e Lartë gjermane vendosi sot se shërbimi gjerman i inteligjencës BfV mund të vazhdojë ta trajtojë partinë e ekstremit të djathtë “Alternativa për Gjermaninë” (AfD) si një parti potencialisht ekstremiste, për këtë arsye ka të drejtën të kryejë mbikëqyrje ndaj saj.

Me këtë vendim, një gjykatë në shtetin gjerman të Rhine-Westfalisë refuzoi apelin e AfD kundër një vendimi të gjykatës më të ulët në Këln në vitin 2022, duke deklaruar se BfV “ruajti proporcionalitetin në masat e saj”.

BfV-së i lejohet, sipas këtij aktvendimi, të hetojë dhe monitorojë AfD-në, përfshirë përgjimet, si dhe të rekrutojë anëtarë të partisë si informatorë, raporton DW.

Ministrja e Brendshme Nansi Feser vlerësoi se vendimi i sotëm dëshmon se Gjermania është e gatshme të mbrojë vlerat e saj demokratike, duke e quajtur atë një “demokraci mbrojtëse”.

AfD, e cila kryeson në sondazhet në disa shtete lindore që shkojnë në zgjedhje më vonë këtë vit, është nën një vëzhgim të shtuar mbi deklaratat e supozuara raciste nga anëtarët e saj dhe akuzat se ka spiunë rusë dhe kinezë në radhët e saj.

AfD, e cila ka ende të drejtën e apelimit ndaj vendimit, ka rreth 20 për qind të votave në sondazhet kombëtare.

LEXONI GJITHASHTU:

• Gjermania po shqyrton ndalimin e dërgimit të armëve në Izrael
• Rama nga Gjermania: Shqipëria nuk dorëzoi asnjë hebre te nazistët gjatë luftës