BE çon Poloninë në gjyq, KE: Ligji për ndëshkimin e gjykatësve minon pavarësinë e tyre

Këtë të mërkurë, Komisioni Evropian ka hedhur në gjyq Poloninë para Gjykatës Evropiane për shkak të reformës së diskutueshme në drejtësi. Ligji polak për ndëshkimin e gjykatësve minon pavarësinë e tyre, deklaroi komisioneri evropian për Drejtësinë.

Debati për reformën në drejtësi mes qeverisë nacional-konservatore në Poloni dhe Bashkimit Evropian është ashpërsuar. Këtë të mërkurë Komisioni Evropian ka hedhur në gjyq Poloninë para Gjykatës Evropiane për shkak të reformës së diskutueshme në drejtësi. Autoritetet e Brukselit shohin rrezikimin e pavarësisë së gjykatësve polakë, bëri të ditur komisioneri evropian për Drejtësinë, Didier Reynders të mërkurën në Bruksel.

Komisioneri evropian për Drejtësinë, Didier Reynders deklaroi se ligji rrezikon pavarësinë e gjykatësve polakë dhe si i tillë bie ndesh me legjislaturën e Bashkimit Evropian

“Komisioni ka vendosur ta çojë Poloninë në Gjykatën e Lartë Evropiane. Ky është një hap i rëndësishëm kundrejt ligjit që Polonia ka miratuar në shkurt të këtij viti mbi sistemin gjyqësor. Ky ligj i ndalon gjykatat polake që të aplikojnë legjislaturën evropiane për të mbrojtur pavarësinë e gjyqësorit. Për më tepër, gjykatësit polakë rrezikojnë pezullimin nëse nuk i garantohet imuniteti”, u shpreh z. Reynders

Sipas Komisionit Evropian ka dy probleme konkrete: Nga njëra ligji për disiplinimin e gjykatësve minon pavarësinë e gjykatësve polakë dhe nuk përputhet me priorizimin e së drejtës evropiane.

Nga ana tjetër dhoma disiplinore e Gjykatës së Lartë polake nuk duhet të jetë më aktive, sepse me gjasa nuk është e pavarur. Ligji për disiplinimin e gjykatësve është në fuqi në Poloni që nga shkurti i vitit 2020. Ai parashikon që gjykatësit të ndëshkohen me gjoba, zbritje në detyrë apo lirim nga detyra, nëse venë në pikëpyetje kompetencën vendimmarrëse apo legjitimitetin e një gjykatësi tjetër, një dhome gjykimi apo gjykate. Po ashtu ata nuk lejohet të aktivizohen politikisht.