Elbasani i beson trajnerit Dede, verdheblutë me synime të qarta në Superligë

Pasi kaloi me sukses sprovën e kategorisë së parë, Elbasani beson se do të jetë një pretendent edhe për titullin kampion në elitën e futbollit shqiptar.

Hapi i parë është hedhur, ndërsa është konfirmuar trajneri Nevil Dede, i cili po ashtu u shpall kampion një kategori më poshtë. 49-vjeçari ka besim se skuadra do të bëjë mirë dhe në Superligë.

“Pra dy gjëra janë; të luajmë futboll bukur, të kënaqim njerëzit. Nëse luajmë futboll atëherë besoj që do të vijnë dhe rezultatet, sepse njerëzit kënaqen duke luajtur bukur“, tha Dede.

Merkato ka qenë një pikë e fortë në sezonin e sapombyllur, e njëjta gjë do të përsëritet dhe këtë vit.

“Ne duam të marrim më të mirët siç e tha administratori dhe presidenti. Investimet dhe qëllimet janë shumë serioze”, u shpreh ai.

Presidenti i skuadrës, Kujtim Llupa ka bërë të ditur dhe objektivin për sezonin e ri.

“Ne do të mundohemi të bëjmë më të mirën për klubin për qytetin për tifozët. Mendoj që jemi në rrugën e duhur, sot fillojmë të merremi direkt me merkaton bashkë me trajnerin, administratorin dhe drejtorin. Më realja është “Final 4”, dëshira kjo është objektivi jonë”, tha Llupa.

Skuadra ka bërë ndryshime sa i përket stafit teknik, duke afruar Isli Hidin, Hektor Idrizajn dhe Elton Kodrën.